BACOLOD CITY — Indi man gihapon mahatagan sang accreditation sang Philippine Health Insurance Corporation kun magabukas liwat sa palaabuton ang Bacolod Our Lady of Mercy Specialty Hospital gamit ang pareho nga pangalan kag mga pasilidad.
Sa interview sang Bombo Radyo kay PhilHealth Region 6 vice president Lourdes Diocson, ginpahayag sini nga kun magabukas ang private hospital sa lain nga pangalan kag maga-apply sila para sa accreditation, iga-subject ini sa accreditation standards.
Sa tion nga makapasar ini, sila ang mahatagan sang accreditation.
Kun lain na ang pangalan sang balay-bululngan suno kay Diocson, maga-apply na ang conditions sang Securities and Exchange Comission kag sikyaron man sang PhilHealth ang ila Board of Directors agud makadesisyon kun igahatag ang accreditation, kasunod sang dako nga bayolasyon sang ownership sang BOLMSH.
Sa karon, may yara sang 8, 000 claims ang private hospital nga indi pa mabayaran sang PhilHealth kasunod sang denial sang accreditation apang may legal remedy pa diri.
Sa tion nga sila ang maga-apela, nagapati si Diocson nga mabayaran ini sang national office bangud nalang sa humanitarian reasons.
Ginpanindugan man sang PhilHealth nga ginatipigan nila ang pondo sang korporasyon rason nga ginadeny ang accreditation sang mga wala nagasunod sa patakaran.
Suno kay Diocson, bangud sa adding of claims kag misrepresentation nga ginhimo sang BOLMSH, nagbayad ang korporasyon sa indi dapat pagbayaran.
Suno diri, ginatipigan lamang nila ang pondo agud indi magkadto sa pipila lang ka mga pasyente ang pondo kag indi maputo ang korporasyon.
Bangud sini, nag-apela si Diocson sa tanan nga mga health providers sa Bacolod kag Negros Occidental nga may accreditation sa PhilHealth nga sundon gid ang mga polisiya agud indi magpareho sa nadangatan sang BOLMSH.
Panindugan ni Diocson, mas maayo ang delivery sang PhilHealth sang universal health coverage sa mga pumuluyong Pilipinhon sa tion nga compliant ang mga health providers.
