Arestado ang isa ka lalaki matapos maaktuhan nga illegal nga nagatakod sang kuryente sa seconday line sang Negros Electric and Power Corporation (NEPC).
Ang suspect ang ginkilala nga si Jimmy Cepeda, residente sang Purok Makawiwili, Barangay Banago, Bacolod City.
Si Cepeda ang naaktuhan nga illegal nga nagatakod sang electric wire sa secondary line sang Negros Power, nga wala nagalabay sa kuntador.
Gilayon man nga ginturn-over sa kapulisan si Cepeda.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, sa inspection sang Negros Power naaktuhan ang pagpatigayon sang illegal tapping gani siya ang gindakop sang mga personnel sang Negros Power kag nag-assists na lamang ang mga kapulisan.
Suno kay Tapang, ang pagpangawat sang kuryente ang ginhimo lamang ni Cepeda para sa iya nga balay.
Ang suspect ang mahimo mangatubang sang kaso nga paglapas sa Republic Act 7832 ukon Anti-Electricity and Energy Pilferage Law of 1994.
Suno kay Negros Power Chief Executive Officer Roel Castro, ang bayolasyon ang may penalidad nga pagkapriso kag multa nga tubtob P100,000.
Nahibaluan nga indi ini ang una nga beses nga nadakpan si Cepeda bangod siya ang nakasuhan naman sadto bangod sa illegal connection.
Sadto, ginpatawag na ini agud bayaran ang iya differential billing, apang wala gid nagpakita ang suspect.
Bangod sa pagpadayun sang illegal nga buluhaton, ginpamonitor ma sa NEPC security team ang iya balay nga nagresulta sa pagka-aresto.
Panindugan ni Castro, nga unfair para sa mga legal nga konsumedor kag regular nga nagabayad sang kuryente, kun may iban nga nagapangawat lamang.
Dugang pa nga ang ginakawat nga kuryente ang nagasulod sa sustem loss kag ginapas-an sang mga legal nga konsumedor.
Ginatindugan sang kompanya nga indi nila palampuwason ang illegal nga aktibidad, kag padayunon pa ang kampanya batok sa power theft.
Panawagan sang Negros Power nga untatan na ang illegal connection, sa baylo magkuha sang legal nga serbisyo paagi sa pagsunod sa proseso para sa patas kag nagakadapat nga distribusyon sang kuryente.
