Wala na sang kabuhi ang biktima nga si John ukon mas kilala sa pangalan nga Ian alyas Mol-Mol Manaay, 37 anyos, sang Prk. Gay, Brgy. Don Jorge L. Araneta, ciudad sang Bago sang maabtan ini sang iya nga utod kaina sang kaagahon sa ila puluy-an.
Suno kay Mary Grace, manghod sang biktima, alas dos ang takna kaina sang kaagahon sang makabati sila sang duha ka asud-asud nga lupok samtang yara sa isa ka namatyan sa ila lugar apang wala ini maglaum nga ang magulang na sini ang naluthangan.
Pasado alas kwatro na sang aga sang makapuli ini sa ila puluy-an kag naghuna-huna lang nga nasup-ay ang biktima bangud naabtan na lang ini nga nag kirig pa. Hulid pa ni alyas Mol-Mol ang isa ka tuig nga hinablos sini nga bata ni Mary Grace sang matabo ang pagluthang.
Pilas sa kamot kag dughan ang naagum sang biktima.
Suno kay P03 Arturo Margallo, duty investigator sang Bago City PNP, malapitan nga ginluthang ang biktima ng sadto pa nagpangatubang naman sang kaso nga Attempted Homicide.
Ikaapat sa walo ka mag-ululutod si Mana-ay kag nagaisahanon lang nga lalaki.
Padayon pa sa karon ang imbestigasyon sang mga kapulisan sa motibo kag ang pagtumod sa may kahimuan sang pagpatay.
