Wala pa sa gihapon makilal-an ang isa ka lalaki nga nasapwan sang Sabado sang gab-i nga wala na sang kabuhi sa Bangga Ibus, Barangay Tortosa, banwa sang Manapla, Negros Occidental.
Sa interview sang Bombo Radyo Bacolod kay Police Major Jaynick Bermudez, hepe sang Manapla Municipal Police Station, nagahapa kag nakabaklid ang kamot sang biktima kag nahigot man sang tape ang tiil sini samtang ang baba sini ang nakabusal man sang tape.
Suno kay Bermudez, may pilas ang biktima sa ulo.
Gintinguhaan pa sang mga ini nga ipatumod sa mga pumuluyo nga nagapang-osyoso sa lugar apang indi ini kilala.
Nagpangayo naman sila sang bulig sa team sang Scene of the Crime Operation sa paglaom nga matumod ini paagi sa forensic examination.
May narecover ang imbestigador sang Manapla Municipal Police Station nga duha ka basiyo sang bala sang caliber .45.
Wala man ginsapak sang mga pumuluyo ang nabatian sang mga ini nga lupok bangud malayo man ini kag ang lugar nga nasapwan ang biktima ang malayo sa pamalay.
Sa karun, yara na sa Manapla Funeral Homes ang biktima.
Nagapanawagan man ang hepe sa mga pamilya nga may himata nga wala nakapauli nga magpadulong lamang sa Manapla Municipal Police Station agud nga mabuligan sa pagtumod sang identity sini.
Ang biktima ang nagataas sang 5’4 tubtob 5’5, nagasuksok sang itom nga sando, blue nga shorts kag may tattoo sa iya wala nga kamot nga may nakabutang nga pangalan nga EDGAR LUSMENDA.
