Pilason ang isa ka lalaki matapos nga magbato sa mga kapulisan sang ginserbehan sang warrant of arrest bangud sa kaso nga paglapas sa Republic Act 10591 ukon illegal possession of firearms sa Spur 14, Brgy. Bunga, banwa sang Salvador Benedicto, Negros Occidental.
Ang warrant of arrest ang gin-issue ni RTC Judge Therese Blanche Bolunia.
Sa interview sang Bombo Radyo Bacolod kay Police Major Ryan Villasario, hepe sang Don Salvador Municipal Police Station, nagapadulong pa lamang ang mga kapulisan sa balay sang subject nga si Ricky Valeriano, residente sang nasambit nga lugar ang nagpalupok na ini kag nagtigayon man ini madis-armahan sang mga kapulisan kag nakaangkon ini sang samad sa liog bangud sang pagdepensa sang mga kapulisan.
Narecover sa subject ang caliber.45 pistol nga gingamit man sini kag nakuha man sa paghinakop sini ang illegal nga druga nga nagabug-at sang 45 grams nga nagabalor sang P306,000.
Suno kay Villasario, may yara man ini sang kaso nga may kaangtanan sa illegal nga druga sadto kag ini ang ginakabig nga street level individual sa banwa kag yara man ini sa listahan sang Barangay Anti-Drug Abuse Council (BADAC) para sa mga drug personalities.
Si Valeriano ang padayon nga ginabulong sa ospital apang ini ang mangatubang sang sampaw sampaw nga kaso nga ginalakipan sang paglapas sa RA 9165 ukon Comprehensive Dangerous Drugs Act of 2002, RA 10591 ukon illegal possession of firearms kag paglapas sa COMELEC Gun ban.
