Lalaki nga halin sa pistahan sa Calatrava, gintiro-patay

Gilayon nga ginbawian sang kabuhi ang isa ka lalaki halin sa isa ka fiestahan matapos nga ginbanggaan kag ginluthang sang wala pa makilal-an nga mga suspetsado sa Barangay Laga-an banwa sang Calatrava, Sabado sang hapon.

Ginkilala ang biktima nga si Crisanto Suelto Jr. 49-anyos sang amo nga lugar.

Sa impormasyon nga nakuha sang Bombo Radyo Bacolod, papuli na ang biktima sa ila nga balay sang hinali lang ini nga ginbanggaan sang duha ka mga suspetsado kag ginluthang.

Nakaangkon ini sang igo sa nagkalain-lain nga bahin sang iya nga lawas.

Gindala pa siya sa Calatrava District Hospital apang gindeklarar nga dead on arrival sang attending physician nga si Dr. Ellen Lumanog.

Sa karon, padayon pa nga ginapangita ang mga suspetsado.