Wala na sang kabuhi sang makita ang 24 anyos nga lalaki nga namissing kahapon kasunod sang paglumpat sini sa dagat matapos nga magkulob ang bangka nga ginsakyan malapitb sa BREDCO Port.
Ang biktima ang ginkilala kay Troy Beloya.
Suno kay Zsa Zsa Beloya, magulang sang biktima, nagkulob ang bangka matapos ginhampak sang mabaskog nga balod samtang sila ang nagapamukot.
Una nga naglumpat si Troy gikan sa bangka kag nagsunod ang magulang sini nga si Jayvee apang ang biktima ang wala na nakabutwa.
Naglumpat ang biktima agud ipasaka ang pukot nga gindagdag agud nga makakuha sang isda.
Suno sa magulang makahibalo gid maglangoy si Troy bangud nagapanahid ini.
Kasunod sang insidente nagpatigayon sang search and rescue ang katapo sang Philippine Coast Guard kag nagupod man ang magulang sini nga si Jayvee agud nga matudlo ang bahin sang dagat nga ginlumpatan ni Troy.
Sang nagdulom na temporaryo nga ginpauntat ang search and rescue operation sa pagpangita kay Troy.
Suno kay Police Captain Depasucat, station commander sang Bacolod Police Station 1, ang mga rescuers ang temporaryo nga naguntat sa search and rescue bangud madulom kag madamo pa sang mga kahoy ukon tangkop sa bahin sang ginapangitaan sa biktima.
Apang kagab-i pasado alas-11:00 ang takna sang gab-i nakabaton sang impormasyon ang Bombo Radyo News Team nga nakita na ang biktima sa Baybay nga sakop sang Bredco Port.
