Nadakpan na ang suspetsado nga nagtiro sa duha ka kaupod sang iya misis nga empleyado sang kalan-an sa Purok Progreso, Barangay Sum-ag ciudad sang Bacolod, Miyerkules sang gab-i.
Ang mga biktima nga sanday Michael Diopeta, 28 anyos kag Jemar Berja, 42-anyos ang napilasan sa tuhod kag abaga samtang ang suspetsado ang ginkilala naman kay Ronell Rey Castillo sang Pedrosa Subd. Brgy Alijis, Bacolod City.
Kahapon sang hapon, nadakpan si Castillo sa balay sang iya pakaisa sa Purok III, Brgy IV-Poblacion, Himamaylan City paagi sa hot pursuit operation.
Sa interview sang Bombo Radyo kay Police Capt. Romulo Gepilango, deputy chief sang Himamaylan City Police Station, pagkatapos sang insidente sa Sum-ag sang Miyerkules, nagpalagyo si Castillo sa Brgy IV-Poblacion apang may nakatimbre sa mga pulis nga nasiplatan ini sa lugar.
Suno kay Gepilango, nakig-angot sila sa Bacolod Police Station 9 agud maidentify ang suspetsado kag maverify ang iya nga itsura.
Sang nakumpirmar na, ginpatigayon na ang hot pursuit operation kag nadakpan si Castillo sa balay sang iya pakaisa.
Nakuha sa possession sini ang caliber .38 revolver nga may mga bala apang lain ini nga armas sangsa gingamit niya sa pagtiro kanday Diopeta kag Berja.
Suno kay Gepilango, nag-ilis si Castillo sang bayo, armas kag motorsiklo antes nagbiya sa Bacolod kag nagpalagyo sa Himamaylan.
Bangud wala ini sang dokyumento nga legal ang pagpossess niya sang armas, mangatubang ini nga kaso nga violation sang RA 10591 ukon illegal possession of firearm and ammunitions kag violation sang Comelec gun ban.
Mangatubang pa gid ini sang kaso nga frustrated murder bangud sa pagtiro kanday Diopeta kag Berja.
Pagkatapos sang booking process sa Himamaylan City Police Station, ginturn-over si Castillo sa Bacolod Police Station 9.
