Patay ang 22-anyos nga lalaki nga nagapanulo sang damang matapos nga nabungguan sang kotse sa Sitio Nato, Barangay Aguisan, Himamaylan City, Negros Occidental, alas-10:40 sang Biyernes sang gab-i, Agosto 9.
Ginkilala ang biktima kay Jaydrick Limsiaco, single, wala sang trabaho kag residente sang Purok Uno, Barangay Saraet, Himamaylan City, Negros Occidental.
Sa interview sang Bombo Radyo kay Police Lt. Col. Anthony Grande, hepe sang Himamaylan City Police Station, hinali lang naggwa sa kampo sang tubo si Limsiaco matapos nga magpangita sang damang kag gilayon nga nagtabok sa dalan.
Nabungguan ini ang Toyota Altis nga ginamaneho ni Aaron Derick Taco, 49-anyos, kag residente sang Barangay Buenavista, Himamaylan City, nga nagikan sa Hinigaran kag nagabiyahe pabalik sa Himamaylan.
Si Limsiaco ang nakaangkon sang pilas sa ulo nga gintunaan sang iya kamatayon.
Suno kay Grande, nakaistorya na si Taco kag pamilya sang biktima kag nagapati ini nga may yara na sang inisyal nga settlement sa magtimbang nga kampo.
Nagpanugyan naman si Grande sa mga pumuluyo nga siguruhon nga hilway ang dalan antes magtabok agud nga indi mabutang ang kabuhi sa peligro.
