Patay ang isa ka lalaki matapos ginluthang sang suspect nga sakay sa pickup sa Lopez Jaena St., Brgy. 27, Bacolod City alas-6:35 kaina sang aga.
Ang biktima ang ginkilala nga si Eugene Sarmiento alias Batok, residente sang Prk Hermilinda, Brgy. Mansilingan, Bacolod City.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 4, ang biktima ang gikan sa sulod sang mga pamalay sa Prk Hermilinda kag pasakay na sa motorsiklo sang ini ang ginluthang.
Ginalantaw ni Bonilla ang posibilidad nga ini ang nagscore ukon naggamit sang illegal nga droga sa lugar.
Sa CCTV footage nga nakuha sang kapulisan, nakita ang gray nga pickup nga nagpondo.
Suno diri, mahimo ginbuksan lamang sang gunman ang bintana sang salakyan kag ginluthang ang biktima.
Sa karun wala pa sang lead ang kapulisan sa suspect.
Sa impormasyon nga natipon sang Bombo News Team, may mga alegasyon nga si Sarmiento ang nagkomiter sang pila ka mga insidente sang pagpangluthang sa ciudad sang Bacolod.
