Nagdangat na sa pito ang kumpirmado nga ginbawian sang kabuhi sa pagkatumba sang mini dump truck sa Sitio San Juan, Barangay Guimbalaon, Silay City.
Sa initial investigation sang Silay City Police Station, lima ang kumpirmado nga napatay sa aksidente, pito ang kritikal ang kondisyon kag 13 ang nag-angkon sang minor injury.
Sakay sa nasambitan nga dump truck ang 24 ka mga Job Order casuals gikan sa Silay City Government nga nagpatigayon sang tree planting activity sa Sitio Patag sa nasambitan nga ciudad.
Sa interview sang Bombo Radyo Bacolod kay Lina Andrade, Job Order Casual kag asawa sang isa sa mga nasamaran, sa pagpasaka pa lamang sa lugar sang aga, nagabisyo na ang mini dump truck.
Suno diri, makapila magpatay patay ang makita sang salakyan, gani may pila nga mga sakay ang naglumpat, apang nagbalik man sang makasaka na sa ibabaw.
Pahayag sini nauna ang mini dump truck sa pagpauli kag sila ang wala pa makahalin sa tree planting site sang ginpahibalo sa aksidente.
Tuman naman ang kakugmat sini bangod sakay sa nasambitan nga salakyan ang iya bana nga si Aaron Andrade, street cleaner sang ciudad.
Ginapakamaayo ni Lina nga wala natam-an ang iya bana kag nag-angkon lamang sang minor injuries.
Suno diri, kuntani wala nalang nagsakay balik ang iya bana bangod umpisa palang nagaguba guba na ang mini dump truck.
