Nakakumpiskar sang lima ka kilo nga karne sang Baboy sa namatyan sa banwa sang EB Magalona, nga nahibaluan gikan sa probinsya sang Capiz apisar pa sa restriksyon sini bangod sa kahangawa sa African Swine Fever (ASF).
Nahibaluan nga ang naconfiscate nga karne sang baboy ang nakuha sa Sitio Banawsawon sa Barangay Tuburan, EB Magalona.
Natukiban nga nagikan pa sa Barangay Daan Banua, Tapas, Capiz ang nasambit nga karne sang baboy.
Santo sa impormasyon nga natipon sang Bombo Radyo Bacolod, nagbisita si Punong Barangay Ramonito Espacio Jr. sa nasambit nga namatyan agud kuntani nga magpalab-ot sang bulig.
Gilayon naman ini nga gin-imbetar sa pagpanyaga, kun sa diin samtang nagasugilanon napamangkot sang kapitan kun diin gikan ang baboy.
Didto na ginpahayag sang tagbalay nga ini ang gindala sang ila nga himata gikan sa Capiz.
Bangod sa pagkaalarma, gilayon man nga ginpahibalo sang Punong Barangay ang impormasyon sa munisipyo sang EB Magalona.
Madumduman nga bangod sa pagkadetect sang ASF virus sa pila ka mga baboy sa Iloilo, tanan nga buhi nga baboy ukon pork products nga gikan sa Panay Island ang ginadumilian na nga magtabok pasulod sa probinsya.
Gilayon man nga ginpakadtuan sang Provincial Veterinary Office sang personnel ang nasambit nga pamilya kun sa diin nakumpiskar ang nabilin nga lima ka kilo nga baboy.
Ginsunog man ini gilayon sa nasambit nga Barangay agud malikawan nga makacontaminate pa sa iban nga baboy enkaso nga ini ang infected sa ASF.
Ginpasalig naman sang pamilya nga didto lamang sa namatyan ginluto kag ginkaon ang karne sang baboy nga dala sang ila himata kag wala na sang may gindal-an pa nga iban.
