Ginahulat pa sang director sa Land Transportation Franchising and Regulatory Board (LTFRB) Region 6 kun ano ang mangin sabat ni President Ferdinand ‘Bongbong’ Marcos Jr. hinali nga ma-endorso na sa iya ang Senate resolution nga magapanawagan sa pagpostpone sang Public Utility Vehicle (PUV) Modernization Program.
Sa interview sang Bombo Radyo Bacolod kay Richard Osmeña, dako ang tyansa nga magboto pabor ang majority sa Senado sa resulosyon nga suspension sang PUV Modernization Program, apang ini ang pag-aprubar ang yara sa kamot sang Presidente.
Sa tion nga aprubahan ni Marcos ang suspension, hulaton pa ni Osmeña kun ano ang derektiba gikan sa Department of Transportation (DOTr) kag LTFRB Central Office.
Dugang pa sini nga dapat maplastar kun ano ang mangin kahimtangan sang mga nagsulod sa modernization program subong man ang mga modernized jeepney drivers kag operators.
Nakita ni Osmeña nga magluwas sa transport sector, madamo pa sang iban nga apektado kaangay sang mga government bank partikular na ang Development Bank of the Philippines (DBP) kag Land Bank.
Suno diri, sa pagsuspender sang PUV Modernization Program, madamo sang mga modernized jeepney drivers kag operators ang mabudlayan sa pagbayad sa bangko.
Sa pihak nga bahin, bisan pahanugutan ang pagbalik sang regular nga byahe sang mga traditional jeepneys, panindugan ni Osmeña nga indi gid gihapon makabyahe sa dalanon ang mga salakyan nga wala makapasar sa Motor Vehicle Inspection System (MVIS) ukon makabig nga indi road worthy.
