Ginhatagan pa sang plaso nga 15 ka adlaw sang Land Transportation Franchising and Regulatory Board (LTFRB) ang mga unconsolidated jeepneys nga makabyahe nga wala sang dakpanay, apang nakadepende naman sa Land Transportation Office (LTO) kun sila ang magapanakop.
Sa interview sang Bombo Radyo Bacolod kay LTFRB Region 6 officer in charge Atty Salvador Altura, matapos sang consolidation deadline sang Abril 30, kuntani indi na makabyahe ang mga unconsolidated traditional jeepneys.
Apang nagpagwa sang statement ang LTFRB Central Office nga nagahatag sang 15 ka adlaw nga grace period epektibo Mayo 1, gani sila ang indi magapanakop.
Pahanumdom naman sini nga bangod ang LTO ang wala sa idalum sang LTFRB, nakadepende man sa ahensya kun sila ang magapadayun sa pagpanakop sang mga makabig na nga colorum nga mga salakyan.
Apang nagapati ini nga bilang inter-agency courtesy, mahimo nga indi na man lang magapanakop ang LTO.
Bangod sini sa Mayo 16 pa maga-umpisa ang paglagas sang LTFRB sa mga magabyahe nga waa nakapaconsolidate, kun sa diin ang 15 ka adlaw ang magaserbe nga transition period.
Apang pahanumdom ni Altura nga may-ara sang risgo sa pagbyahe sang mga unconsolidated traditional jeepneys.
Paathag sini nga narevoke na ang provisional authority sang mga ini gani kadungan man nga nag-expire na ang ila nga insurance.
Suno diri, hinali nga may magluntad nga aksidente, wala na sang insurance ang mga sumalakay.
Pahayag sang opisyal nga kuntani may ara sang mga sticker ang mga consolidated traditional jeepneys agud matumod sang mga pasahero kun diin ang safe nga sakyan.
Nagapati ini nga sarang makahatag sang sticker ang City Government kun magapakig-angot ang mga consolidated jeepney operators, apang aminado man ini nga indi madali ang paghimo sini.
