BACOLOD CITY — Iga-propose sang Land Transportation Office sa city government sang Bacolod nga ikonsiderar ang pagbutang sang closed-circuit television camera ukon CCTV agud mamonitor ang mga driver nga nagagamit sang electronic gadgets bisan nagamaneho sang salakyan.
Ini bangud nga aminado si LTO Bacolod Head Renato Novero nga mabudlay ang ila pagdakop sang mga nagalapas sa Anti-Distracted Driving Act ukon ADDA nga nangin epektibo na humalin sang Hulyo 6.
Suno kay Novero, wala pa gid sila sang may nadakpan sa Bacolod kag Negros Occidental humalin sang ginpatuman ang ADDA sang Hulyo 6 tubtub subong nga adlaw.
Indi pareho sang Metropolitan Manila Development Authority nga may madamo sang nadakpan bangud may yara sila sang CCTV nga nagamonitor sa mga dalan.
Kun may CCTV camera kuntani suno kay Novero, ma-capture ang plate number sang salakyan kag mapadal-an sang notice ang driver nga naglapas ini sa kasuguan.
Kun enforcers lamang sang LTO suno sa iya ang magapangdakop, makapreparar ang driver kun makita sini ang mga tinawo sang ahensya.
