BACOLOD CITY — Ginahandaan sang Negros Occidental Police Provincial Office ukon NOcPPO ang lubong ni Police Supt. Arnel Arpon nga nakatalana sa Sabado, Agusto 5.
Si Arpon ang hepe sang Guihulngan City Police Station kag isa sa anom ka mga pulis nga napatay sang gin-ambush sang mga miyembro sang New People’s Army sa Barangay Magsaysay sang Hulyo 21.
Suno kay NOcPPO Director Police Senior Supt. Rodolfo Castil Jr., may dugang nga sightings sang NPA sa pila ka bahin sang Negros Occidental humalin sang nagluntad ang ambush sa ciudad sang Guihulngan apang wala niya ginhambal kun sa diin ini nga mga banwa.
Ginapaabot na sang mga pulis nga gamiton sang NPA ang lubong ni Arpon bilang rason sa pagpatigayon sang dugang nga opensiba amo gani nga magapakig-angot sila sa Philippine Army.
Apang panindugan ni Castil, kun himuon ini sang mga rebelde, nagapatimaan lamang ini nga sila ang mga terorista.
Samtang, wala naman sang duda suno sa NOCPPO director nga NPA ang nag-ambush sa mga miyembro sang Guihulngan City Police Station.
Suno kay Castil, akuon man sang mga rebelde ukon indi, hayag naman nga sila ang responsable sa krimen.
Sa pihak sa bahin, luyag lamang sang NPA nga hinakpan ang patraidor kag indi tawhanon nila nga pag-atake sa mga katapo sang Guihulngan City Police Station kag mga sibilyan sa ciudad sang Guihulngan.
Ini ang ginpahayag ni Third Infantry Division Spokesperson Capt. Eduardo Precioso kasunod sang pagpaguwa sang statement sang Leonardo Panaligan Command sang NPA sa diin ila ginakabig nga madinalag-on ang ila opensiba batok kay Councilor Edison dela Rita kag Guihulngan PNP nga ginkamatay sang anom ka pulis kag isa ka sibilyan.
Sa pahayag sang mga rebelde, ang opensiba ila ginpatigayon bangud sang mga pagpatay kag kurapsyon nga ginahimo sang mga pulis kag sang konsehal.
Suno kay Capt. Precioso, lunsay alegasyon lamang ini sang NPA nga kagustuhan sang mga pumuluyo ang ila ginhimo bangud sa pagkamatuod, indi maluyag ang mga taga-Guihulngan sa mga rebelde.
Ginpabutyag sang tagpamaba sang 3rd ID, nahibaluan sang bug-os nga ciudad sang Guihulngan nga wala sang ginahimo nga malain ang ila kapulisan, labi na ang ila hepe nga si Police Supt. Arnel Arpon, nga tatlo kabulan pa lamang nga nadestino sa lugar.
