Ginareklamo ang maestra nga nagatudlo sa isa ka buluthuan sa banwa sang Calatrava, Negros Occidental nga gina-alegar may relasyon sa babayi nga estudyante.
Sa interview sang Bombo Radyo Bacolod kay Ian Arnold Arnaez, Public Information Officer sang DepEd- Division of Negros Occidental, ang maestra nagatudlo sa secondary level kag may isa ka babayi nga complainant nga nagpahibalo sa ila angot sa relasyon sang maestra kag estudyante.
Suno sa complainant, naka-agi man nga nagkarelasyon ang maestra sa iban pa gid nga estudyante.
Suno kay Arnaez, wala sang formal complaint nga ginfile batok sa maestra apang nag-umpisa sila sang ila inisyal nga imbestigasyon.
Apang suno diri, mas maayo nga may yara sang formal complaint agud mahatagan sang madalum nga pag-imbestigar ang nasambit nga issue.
Sa karun padayon nga nagatudlo ang maestra sa buluthuan.
Pa-athag ni Arnaez, wala ginapahanugotan nga may yara sang relasyon sa tunga sang manunudlo kag estudyante bangod ini kabahin sang professional ethics bilang isa ka government employees.
Dugang pa sini, indi manami lantawon nga ang karelasyon sang manunudlo ang iya mismo estudyante.
