BACOLOD CITY – Hugot nga ginpanginwala sang maestro sa Father Gratian Murray Integrated School sa Barangay Granada ang alegasyon nga iya ginhulid kag ginmolestiyahan ang 16-anyos nga estudyante, santo man sa reklamo sang iloy nga ginpadangat sa Division Office sang DepEd Bacolod City.
Kahapon sang udto, personal nga nagpadulong sa Bombo Radyo si Robert de Tomas agud nga klaruhon ang iya pangalan sa tunga-tunga sang amo nga alegasyon.
Suno diri, ginpahanugutan niya ang 16-anyos nga estudyante nga magtulog sa ila balay sa Charito Heights Subdivision sa Barangay Granada pagkatapos ang Dragon Dance sang Pebrero 10 bangud gab-i na kun mapauli pa ini sa ila balay sa Barangay Alangilan.
Apang gin-athag sini nga wala siya sa amo nga balay, kundi kaupod sang estudyante ang isa man niya ka classmate nga si Bea nga taga-Alangilan man.
Ginkumpirmar naman ni Bea nga wala na sila nakaagi tulog sa balay ni de Tomas magluwas sang Pebrero 10 kag iya gin-athag nga wala siya gintandog sang CAT teacher.
Suno kay Bea, ginpilit pa siya sang iya lola nga magtestify batok sa maestro apang indi niya ini mahimo bangud indi man matuod nga ginhilabtan siya sini.
Kadungan sini, ginpanginwala ni de Tomas nga nagpakitluoy siya sa pamilya nga indi na pagdayunon ang reklamo.
Suno diri, makaduha na sila ka beses nga nag-istoryahanay sang pamilya apang wala man sang progress bangud wala sang kumpirmasyon halin sa estudyante nga gintandog siya sini.
