Tuman ang kaluoy sang mag-asawa sa Barangay Concepcion, Talisay City gani sila ang wala nagduhaduha nga buligan ang 11 anyos nga bata nga babayi nga nagpalagyo matapos brutal nga ginkastigo sang iya iloy, tiya kag mga katiyuan.
Sa interview sang Bombo Radyo Bacolod sa mag-asawa nga Archie kag Maricar Tumayao, alas-3:00 sang kaagahon sang Abril 5, nagdangop sa ila tindahan ang bata agud magpangayo sang tubig.
Tuman na lamang ang kakibot sang bana sang makita ang sitwasyon sang bata.
Suno sa mga ini ang nawala nga kamot sang bata ang naga-untay na lamang kag indi na matiko, samtang ang natuo nga kamot ang matiko apang indi naman ma-untay.
Ini ang puno man sang lagob sa nawong kag nagahumok na ang ulo bangod sa mga bukol.
Nagabuktot naman ang likod sini bangod masami nga ginalampusan sang pala sang iloy.
Ini ang may mga kagat man sang ido sa iya nga hita kag batiis.
Paathag sang mag-asawa nga wala nila ginpilit nga magsugid ang bata, apang ini na mismo ang naghibi kag nagsugid sang nagakatabo.
Pahayag sang mga ini, indi nila kilala ang bata bangod isa palang sila ka bulan sa lugar, samtang wala man sang ihibalo ang mga tawo sa palibot bangod ginatago sang iloy ang bata.
Suno sa biktima nga ginapahayag sang iya iloy nga siya ang abnormal, gani ini ang iya ginamaltrato, kag wala ginapa-eskwela.
Panindugan sang mag-asawa nga maayo magsugilanon ang bata, kag wala sila nagapati nga ini ang abnormal.
Dugang pa nila nga ang matawag nga abnormal amo ang iloy kasubong man ang tiya kag mga katiyuan sini.
Ang bata ang nagapanimaho pa sang higko sang baboy bangod ini ang ginpriso sa septik tank, kag ginpilit lamang sini nga makataklas apisar nga bali-bali na ang mga kamot.
Pahayag sang mag-asawa nga ang naga-apin lamang sadto sa bata amo ang iya step father nga engineer, apang ini ang nagpadulong sa Manila apat ka bulan na ang nakaligad.
Nakabatun man sila sang impormasyon nga nagpadulong man sa balay ang lola sang bata agud kuntani ini ang kuhaon, apang wala nagsugot ang iloy sa rasun nga siya ang wala na sang kastiguhon.
Apisar sa ginhimo, indi luyag sang biktima nga mapriso ang iya iloy nga nagabusong bangod naluoy man ini sa iya tatlo ka manghod.
Ang bata, ang ginpakuha na ni Talisay City Mayor Niel Lizares sa Department of Social Welfare and Development.
Kahapon, napasaka naman ang kaso nga Rape in relation to Republic Act 7610 ukon Anti-Child Abuse sa apat ka mga suspetsado.
