Arestado ang mag-asawa nga nakuhaan sang kapin sa 275 grams sang illegal nga druga matapos nga ginserbehan sang search warrant sang katapo sang Philippine Drug Enforcement Agency (PDEA)- Negros Occidental Provincial Office, sa Prk. Boulevard, Brgy. 14, ciudad sang Bacolod, Negros Occidental kaina sang aga.
Sa interview sang Bombo Radyo kay Agent Bamboo, team leader sang PDEA- Negros Occidental, ginserbehan sang search warrant ang subject nga si Rufert ‘Jake” Martir, 44 anyos, construction worker sa BREDCO, kapin alas- 7:30 kaina sang aga apang pag-abot sa ila puluy-an wala didto si Martir kag ang asawa lang sini nga si Ronalyn Martir, 34 anyos ang naabtan sang PDEA.
Suno diri, may yara sang mga CCTV sa area nga ginagamit sang mag-asawa sa pagmonitor kag sang nakita ni Rufert nga may padulong nga katapo sang PDEA nagpalagyo ini.
Nagsaka si Rufert sa atop nga sin apang bangod sa tuman ka init naglumpat ini sa bahin sang atop nga wala sang C purlins sa tuyo nga magpadulong sa balay sang iya iloy apang nadagdag ini kag nag-agom sang samad sa tiil.
Ginpahayag pa si Ronalyn sa mga otoridad nga isa ka tuig na sila nga wala nagkitaay sang iya bana nga nagatrabaho sa Manila.
Madugay na nga yara sa priority target list sang PDEA si Martir nga ginakabig nga No 1 Regional Target Level sa Region 6.
Sa pagpatigayon sang search operation may nakuha nga suspected shabu sa lata nga nasulod sa plastic sa sulod sang cabinet.
Narekober ang 25 ka sachet kag isa ka knot tied transparent plastic sachet sang suspected shabu nga nagabug-at sang kapin 275 grams nga ginabanta nagabalor sang P1,870,000.
Pahayag ni Bamboo, may yara sang mga tawo nga naga-uyat sang supply sang illegal nga druga magluwas sa narekober sa mag-asawa.
