Natalana nga pasakaan sang kaso ang mag-iloy nga nadakpan sa ginpatigayon nga drug buy-bust operation sang Bacolod City Drug Enforcement Unit (CDEU) sa Purok Progreso 1, Barangay Vista Alegre, Bacolod City alas-8:38 kagab-i.
Ginkilala ang subject person nga sanday alyas “Esmeralda’, 49-anyos, kag si Queny Escala, 25-anyos, lunsay wala sang trabaho kag residente sang nasambit nga lugar.
Sa interview sang Bombo Radyo kay PLt Col Albert Sy, pinuno sang Bacolod CDEU, ang iloy nga si Esmeralda nadakpan man sadto sa kaso angot sa illegal nga druga kag napreso sang 2021 apang nakagwa sang 2025.
Suno diri, ang utod sini nadakpan man sa kaangay nga kaso.
Suno kay Sy, ang mag-iloy gikan sa Barangay 2 ang kabahin sa mga ginrelocate sa Brgy Vista Alegre.
Nahibaloan nga ang mag-iloy man ang nagatransaction sang illegal nga druga sa Brgy 2.
Sa ginpatigayon nga drug buy-bust operation nakumpiskar sa mag-iloy ang lima ka heat-sealed transparent plastic sachets sang suspected shabu kag isa ka knot tied transparent plastic bag sang suspected shabu; P1,000 buy-bust money kag iban pa nga non-drug items.
Ang nakumpiskar nga illegal nga druga ang ginabanta nagabug-at sang 60 grams kag may standard drug price nga P408,000.
Pahayag ni Sy, sa karun nagmahal na ang presyo sang illegal nga druga nga gikan sa P6,000 nagsaka na ini sa P18,500 kada bulto.
