Pilason ang duha ka mga kabataan sa syudad sang Bacolod matapos nga ginbuno sang gunting sang ila mismo amay kaina sang aga.
Ginabanta nga alas-6:45 kaina sang aga sang ginbuno ni Elmer Laruan ang duha ka tuig nga bata nga lalaki kag tatlo ka tuig nga bata nga babayi sa ila mismo nga balay sa Purok Paraiso, Sitio Sibucao, Brgy. Banago.
Sa pagpangusisa sang Bombo Radyo Bacolod, sa li-og ang pilas sang duha ka mga bata.
Nagaluto sang palamahawon kag nagatimpla sang gatas ang misis ni Laruan nga si Cherry sang nabatian sini nga naghibi ang iya nga mga bata.
Sang ginlantaw sang iloy, nakit-an sini ang mga bata nga duguon kag natukiban nga ini ang ginbuno ni Laruan sang gunting.
Gindala sa Corazon Locsin Montelibano Memorial Regional Hospital ang mga biktima.
Gilayon naman nga nadakpan ang amay kag priso sa karon sa Police Station 3.
Sa imbestigasyon, napulo ang kabug-usan nga kabataan ni Laruan kag ang mga biktima ang ikawalo kag ika-siyam nga bata.
May nagatuhaw man nga impormasyon nga bangag pa sa illegal nga droga ang suspetsado.
Sa pagkamatuod, indi pa ini maistorya sang Bombo News Team sang ginbisitahan sa Police Station 3.
