Padayun nga nagapaayo sa ospital ang isa sa duha ka mag-utod nga nag-agom sang malala nga paso sa sunog nga nagluntad sa Purok Riverside, Brgy Banago, Bacolod City sang Disyembre 31, 2025.
Madumduman nga apat ka structure ang naulamid sa sunog nga ginalakipan sang duha ka Mercantile establishment kag duha ka Single Storey buildings.
Ang kalayo ang natumod nga gikan sa H & D Hardware store nga ginapanag-iyahan ni Devilyn Maniego, kun sa diin lakip sa nasamaran ang duha ka empleyado nga sanday Prence Villarin kag Demar Villarin.
Sa interview sang Bombo Radyo Bacolod kay Babylin Vargas, kaupod sini ang iya mga manghod apang siya ang naglakat agud kuntani magpamakal sang lulutuon para sa New Year.// Siya ang gintawagan na lamang nga gindala na sa ospital ang duha sini ka manghod bangod sa sunog.
Ang importante na lamang para kay Vargas nga buhi ang iya duha ka manghod.
Si Prence ang nag-angkon sang 2nd degree burn sa iya batiis samtang si Demar ang nag-agom sang 3rd degree burn.
Sa interview sang Bombo Radyo Bacolod kay Prence Villarin, nagarefill sila sang butane cannister sang hinali nga nagspark ang malapit nga saksakan.
Suno diri, gindakop sang kalayo ang sungaw gikan sa LPG tank kag nagpuswak sa ila ang kalayo.
Nakagwa pa sila nga mag-utod kag nag-agom lamang sang mga paso sa batiis, apang nabilin sang manghod nga si Demar ang iya cellphone nga may naka-ipit nga P4,000.
Suno diri, ginpunggan pa sini ang manghod apang nagpamilit gid nga makabalik bangod nakanugunan ini sa P4,000 nga gamiton pa nila sa new year.
Pahayag ni Prence nga wala gid nakuha ni Demar ang cellphone kag kwarta, sa baylo ini ang napilitan nga magsulong sa kalayo agud lamang liwat nga makagwa.
Bango sini siya ang nag-agom sang 3rd degree burn sa nawong, butkon, likod, batiis kag iban pa.
Sa karun, nakagwa na si Prence apang si Demar ang yara gihapon sa ospital apang estable naman ang kondisyon, apang ini ang ginacatheter.
