Patay ang magtiyo matapos nga gintiro sa Sitio Pitgong, Barangay Oringao, Kabankalan City, Negros Occidental kahapon sang hapon.
Ginkilala ang mga biktima nga sanday Raniel Delo Santos alyas “Dongdong”, 40 anyos, mangunguma kag residente sang Purok Pinamus-an Barangay Camingawan, Kabankalan City, Negros Occidental kag Loreto Delo Santos alyas “Daku”, 54 anyos, mangunguma kag residente sang Purok Mansawin, Barangay Oringao, Kabankalan City.
Sa interview sang Bombo Radyo Bacolod kay Police Lt. Col. Roberto Indiape, hepe sang Kabankalan City Police Station, ang duha ka mga biktima nga magtiyo ang ginpalapitan sang tatlo ka mga wala makilal-an nga suspek kag gintiro gamit ang short firearms.
Gindala pa ang mga biktima hingagaw sa ospital apang gindeklarar nga dead on arrival.
Nakaagom sang pilas sa ulo kag lawas ang mga biktima.
Suno kay Indiape, alas 3:30 natabo ang shooting incident apang ang report ang ila nabaton pasado na alas 5:00 ang takna sang hapon.
Ginahibalo pa sa karun sang mga kapulisan sa Kabankalan ang motibo kag mga suspek sa nagluntad nga shooting incident.
Bangud nga malayo ang lugar sang insidente kag ginakunsiderar nga insurgency affected, nakig-angot na ang mga kapulisan sang Kabankalan City sa Philippine Army para sa clearing operation agud nga makapatigayon sang imbestigasyon.
Nagapanawagan man si Indiape sa mga residente nga posible nakawitness sang krimen nga indi magkahadlok sa paghatag sang impormasyon agud matumod ang suspek kag mapasaka ang kaso batok sa mga ini.
