UPDATE – Nadakpan na ang magulang nga suspetsado nga nagpamatay sang iya mga manghod sa banwa sang Calatrava kahapon sang hapon.
Ini ang ginkumpirmar sang hepe sang Calatrava Municipal Police Station Police Senior Inspector John Joel Batusbatusan.
Suno sa hepe, pasado las-6:00 kaina sang aga sang nakit-an sang mga residente nga nagapanago man lang malapit sa ila nga puluy-an ang suspetsado nga si Junmark Melibo, 21-anyos sa Sitio Palala, Barangay Marcelo.
Mismo ang mga residente ang nagdakop sa suspetsado kag gin turn-over sa kapulisan.
Suno kay Batusbatusan, nagbulig man ang militar kag mga opisyales sang baranggay agud madakppan ang suspetsado.
Yara na karun sa isa ka punerarya sa banwa sang Calatrava ang bangkay sang mga biktima nga sanday Gregor, 1 ka tuig; Alejandro, 5-anyos; kag Jhorens,14-anyos, nga ginpamatay sang ila magulang nga ginapahayag may problema sa paminsaron.
Nagapati man ang hepe nga may problema gid sa paminsaron ang suspetsado bangud nga tuman kanabaw ang rason nga patyon sini ang iya mga manghod bangud nga wala lamang sang tinig-ang sa iya nga pagpauli.
Sang gin-usisa ang suspek, ginpahayag sini nga si Poseidon ukon ang God of the Sea ang nagsugo sa iya nga patyon ang iya mga manghod.
Suno sa hepe, desidido gid ang mga ginikanan sang suspek nga pasakaan ini sang kaso.
Ang korte na lang suno sa hepe ang magadesisyon kun may problema gid man sa paminsaron ang suspek.
Ang iloy sang mga ini ang yara nagatrabaho sa Metro Manila kag magapauli sa Calatrava sini nga adlaw.
Madumduman nga gilayon nga nagpalagyo ang suspetsado matapos ang krimen.
Una na nga ginpahayag kahapon ni Councilor Honeyboy Goc-ong nga naga-hingyo ang suspetsado nga ma-eskwela ini subong nga Hunyo apang bangud sa kapigaduhon, wala ini nakapa-enroll.
Ginapasuni man nga nagapanakit ini kun indi mahatag ang iya ginapangayo.
Madumduman nga plamingko ang gingamit sang suspetsado sa pagpatay sang iya mga manghod.
