Nagasimpatya ang deputy minority leader sa House of Representative sa sitwasyon sa karun sang mga traditional jeepney drivers.
Sa interview sang Bombo Radyo Bacolod kay ACT Teacher’s Partylist Representative Franz Castro, wala na dapat sang deadline sa consolidation para sa public utility vehicle (PUV) modernization program.
Makita sini nga ang business model sang gobyerno ang indi paborable para sa mga drivers kag magagmay nga operators ilabi na nga ang presyo sang mga modernized jeepneys ang nagadangat sa P2.8 million tubtob P3 million.
Panindugan sini nga sa nasambitan nga presyo, malumos sa utang ang mga drivers, kag ini ang wala man niya nakita nga mangin sabat sa transportation crisis.
Hingyo sini nga ipabilin na lamang ang individual franchise sang mga drivers kag sila ang pahanugutan nga makapangabuhi.
Dugang pa sini nga tuman ka pabor sa mga foreign business ang PUV modernization program kun sa diin apisar nga may luyag magsulod nga mga local industriya nga nagahimo sang modernized jeepneys, ini ang wala ginasuportahan kag wala ginabuligan.
Nakita sini nga mas ginapilit ang pagpasulod sang mga imported mini-bus.
Pahayag ni Castro nga madamo naman ini sang nabatian nga reklamo gikan sa mga nagsulod sa kooperatiba kag korporasyon kag kaangay nga may ginapaburan ang Land Transportation Franchising and Regulatory Board (LTFRB).
Suno diri, tubtob sa karun wala pa natul-id ang Local Public Transport Route Plan (LPTRP) nga dapat una nga masolusyunan.
Panindugan sini nga sa patigayunon nga Committee on Transportation meeting sa masunod nga semana, ang Makabayan bloc ang magapanawagan sa pagpalos sang deadline sa consolidation, pagpahanugot sa single franchise kasubong man pagpahanugot sa upgraded traditional jeepneys basta sulod sa clean air act requirements sang PUV modernization program.
