Nagpatuman sang mas hugot nga seguridad ang Senado kadungan sang gintalana nga deadline sang sabat ni Vice President Sara Duterte angot sa Articles of Impeachment.
Santo sa abiso, tubtob alas-7:00 sang gab-i Hunyo 1 lamang mahimo makasumiter ang bise presidente, personal man, ipaagi sa abogado, ukon sa electronic mail.
Ginalauman nga mag-umpisa ang impeachment trials sa Hulyo 6 sa diin maatubang ang bise presidente sa mga kaso nga culpable violation of the Constitution, graft and corruption, kag betrayal of public trust.
Nagpreparar naman ang Office of the Senate Secretary sang mga pagsulondan para sa coverage sang media kag nagtalana sang mga lugar kun diin makapatigayon sang press briefing ang kampo ni Duterte.
Nagpakig-angot naman ang National Capital Region Police Office (NCRPO) sa Office of the Sergeant-at-Arms agud sigurohon ang seguridad sa palibot sang Senado.
Magabantay naman ang mga kapulisan sa gwa sang building bangud sa mga ipatigayon nga rally sang nagkalain-lain nga grupo.
Samtang, sa idalom sang Rules of Procedure on Impeachment Trial, may lima ka adlaw ang prosecution panel agud magsumiter sang ila nga sabat matapos mabaton ang sabat sang Bise Presidente.
