Nagdangat na sa 783, 224 ang mga pumuluyo sa probinsya sang Negros Occidental nga nakaparehistro kag nakuhaan na sang biometrics para sa Philippine ID.
Sa interview sang Bombo Radyo Bacolod kay Luis Gonzales, chief statistical specialist sang PSA-Negros Occidental, 100,000 sang kabug-usan nga numero ang nagikan sa syudad sang Bacolod.
As of May 25 suno kay Gonzales, nalab-ot na sang ila opisina ang 95 porsyento sang target para sa subong nga bulan.
Sa tinutuyo nga madecongest ang paggilinutok sang mga nagaparehistro sa Rizal Elementary School, nagbutang na sang registration centers sa mga mall sa probinsya sang Negros Occidental kasubong man sa syudad sang Bacolod agud nga indi na maggilinutok ang mga luyag magparehistro sa nasambit nga eskwelahan.
Ang mga mall ang ginlakipan sang City Mall, Robinsons, SM City kag Ayala Mall kag nakadepende man sa mall hours ang ila nga oras sang registration.
Ginpahayag man sang chief statistical specialist sang PSA-Negros Occidental nga bukas man ang registration sa opisina sang PSA-Negros Occidental tubtob alas-10:00 sa gab-i agud makaakomodar sang working public nga luyag magparehistro para sa national ID.
Ginduha man nila ka shift ang mga nagaduty nga staff agud nga may maduty sa aga kag gab-i.
Suno kay Gonzales, mahimo man nga makawalk-in sa mga registration centers sa mall ukon sa opisina sang PSA ang mga luyag nga magparehistro bisan ang mga indi tumandok sang probinsya sang Negros Occidental kag syudad sang Bacolod.
Wala sang deadline ang pagparehistro bangud tuyo sang ahensya nga marehistro sa national ID ang tanan nga mga Pilipino.
Suno kay Gonzales, mabuhinan man ang machine nga ginagamit para sa registration bangud gamiton man ini sang iban nga probinsya nga wala pa nakaumpisa sang ila registration sang national ID.
Gin-athag man sini nga 15 anyos pasaka pa lang ang ginapahanugutan nga magparehistro sa national ID.
