Patay ang 58-anyos nga manghod matapos nga ginbuno sang iya nga magulang kasunod sang pagbaisay sa Purok Kalubihan, Barangay Bacong, Bago City, Negros Occidental.
Ang suspetsado ang ginkilala kay Hernane Vicente, 66 anyos; samtang ang biktima ang ginkilala nga si Arturo Vicente, 58 anyos lunsay mga residente sang nasambit nga lugar.
Suno kay P/Staff Sgt Erwin Jamandre, imbestigador sang Bago City Police Station, sang aga palang sang Domingo nakainom na ang biktima kun sa diin may nagluntad nga pagbaisay sa tunga nila sang iya nga magulang apang ini ang gilayon man nga natambagan.
Apang sang hapon, liwat nga nagsugataay ang mag-utod kun sa diin ginpakamaayo nalang ni Hernane nga maglikaw sa manghod kag magdalagan pauli sa ila balay agud makalikaw sa gamo.
Apang ginlagas ini sang manghod kag gingarit-garit kadungan sa pagpanghangkat sang away.
Bangod sa edad nga 66 anyos, ginhapo naman si Hernane gani siya ang nalab-ot ni Arturo.
Ginalantaw ni Jamandre nga bangod sa paggarit-garit sang manghod, nangutos ang magulang gani ginkuha sini ang iya nga binangon kag ginbuno si Arturo.
Ang biktima ang nakaangkon sang buno sa nawala nga kilid nga ginalantaw ni Jamandre mahimo nag-igo sa lungs ukon corazon.
Ginhingagaw pa sang rescue unit nga madala sa Bago City Hospital ang biktima apang ini ang gindeklarar nga dead on arrival.
Nagpanago pa sa kasi-utan ang subang apang nagsungka man kahapon sang aga kun sa diin tuman man ang paghinulsol sini sa gina-alegar indi hungod nga pagbuno diri.
Santo naman sa bata sang biktima, indi na ang mga ini magapasaka sang kaso sa iya tiyo bangod kilala man nila ini nga mabuot kag isa man ang mga ini ka pamilya.
Sa paghinon-anun sang kapulisan sa utod sang duha nga si Nestor Vicente, ginpahayag sini nga may gamay nga pagbaisay ang mag-utod bangod sa gamay nga lote nga ginatukuran sang ila balay.
