Ginbawian na sang kabuhi ang manicurista sa Bacolod City Public Plaza nga ginbuno sang gina-alegar iya gina-bugaw, pasado alas 3:00 ang takna kahapon sang hapon, Setyembre 17.
Ginkilala ang biktima nga si Alyas Ana samtang ang suspek ang ginkilala kay alyas Joan.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 1, ginpahayag sang imbestigador nga ginkumpirmar sang medical attendant sa Corazon Locsin Montelibano Memorial Regional Hospital nga napatay na ang biktima.
Suno kay Bonilla, mahulog na sa murder ang kaso nga ifile sa suspek bangud napatay ang biktima.
Gina-alegar nga may indi paghangpanay sa duha may kaangtanan sa presyuhanay sa ila nga transaksyon.
Ginpahayag nga una na nga nagpangayo sang bulig ang biktima matapos makabaton sang pamahog sa kabuhi kag ini ang ginpanugyanan nga magpadulong sa Bacolod City Police Station 1.
Makaligad ang pila ka oras, nakita na nga duguon ang biktima samtang nagapalagyo matapos nga siya ang ginbuno sang suspetsado.
Nakaagom sang kapin duha ka pilas ang biktima tuga sang pagpamuno.
Samtang gilayon nga nakapalagyo ang suspetsado sakay sa motorsiklo.
Ginalantaw nga mapasakaan man sang kaso nga murder apang sa mas manubo nga sentensya kun mapamatud-an nga nagbulig sa krimen ukon accessory ang live-in partner sang suspect.
