Liwat nga ginbuksan ang Manokan Country kag liwat man nga ginhatagan sang extension ang pagsaylo sang mga tenant sa ila temporaryo nga pwesto.
Sa interview sang Bombo Radyo kay Councilor Celia Flor, chairperson sang Committee on Markets sa Sangguniang Panlungsod, matapos ang pakighinon-anon sang mga tenants kay Bacolod City Mayor Alfredo ‘Albee’ Benitez, nagpakita ang mga ini sang ila nga intensyon nga magsaylo.
Bangod sini, ginhatagan sang alkalde sang extension ang mga tenants tubtob sa Agosto 19 para magsaylo, ini samtang may yara pa sang dugang nga ginakay-o sa temporaryo nila nga saylohan.
Apang, suno pa sa alkalde mas maayo man kun may yara na sang makasaylo bangod nga sila ang mahimo makabaligya sa ila temporaryo nga pwesto kasubong man sa Manokan Country.
Ginhatagan sang libre nga pagtinir ang mga tenants sa ila temporaryo nga pwesto sa terminal hub sang SM mall, sa sulod lamang sang 18 ka bulan samtang ginaconstruct pa ang bag-o nga Manokan Country.
