Mahimo nga natural nga nadiskubrehan ang nagatambak nga napudpod nga mga coral malapit sa Sabina shoal ukon kilala man sa tawag nga Escoda shoal sa West Philippine Sea.
Ini ang ginpahayag ni Dr. Jonathan Anticamara, marine scientist halin sa University of the Philippines Institute of Biology nga nagpadulong sa lugar agud nga magpatigayon sang marine scientific survey.
Ginpamangkot man sa isa ka pahayag ang marine scientist kun may yara nga reclamation activities sa Escoda shoal matapos nga pahayag sang Philippine Coast Guard nga ang napudpod nga mga coral ang gintambak bilang preparasyon para sa island-building sang China.
Suno pa diri, indi 100 porsyento nga sigurado kun may yara sang paghaboy sang corals ukon reclamation sa lugar bangud wala nakita ang China nga nagahaboy sa lugar apisar nga naobserbahan sa mga nakaligad nga tuig ang nagadamo nga gintambak nga pudpod nga corals.
Gin-athag pa sang marine scientist nga sa kalaparon sang naguba ukon napatay nga corals nga nasambit nga shoal mahimo ini ang bangud sa mga bagyo nga nagtupa sa lugar.
Apang liwat nga nagpanindugan ang marine scientist nga ang mga coral sa Escoda shoal ang halos 100 percent sang patay sa gitna sang naobserbahan nga kalaparon sang coral bleaching.
Wala naman sa karun sang ebidensya agud nga mahambal nga China ang may kahimuan sa nadiskubre nga malapad nga kahalitan sa mga coral sa lugar.
Kaangot sini, ginrekomenda ni Anticamara nga dapat maghimo sang konkreto nga tikang agud nga mabawi kag mabuli liwat ang naguba nga coral reefs sa Pilipinas.
