Nagtaliwan na sa edad nga 86 ang martial arts legend nga si Chuck Norris, nga mas nakilala sa iya mga pelikula, appearance sa TV series kasubong man sa internet lore.
Sa naggwa nga report, si Norris ang na-ospital sa Hawaii, apang wala na ginbuyagyag kun ano ang rasun.
Pahayag sang pamilya, nga natapos ang kabuhi sang martial arts legend kag aktor nga may pagtuo, may purpose, kag dala ang indi matupongan nga commitment sa mga tawo nga ginapalangga sini.
Ang ulihi sini nga major film appearance amo ang sa “The Expendables 2” sang 2012 kaupod kay Sylvester Stallone, Jason Statham kag Jet Li.
Naghatag man sang tribute kag pagpakig-unong si Stallone, kasubong man si Jean-Claude Van Damme para sa aktor kag sa nabilin sini nga pamilya.
Si Norris ang una nga nakilala worldwide bilang mabaskog nga kasumpong ni Bruce Lee sa 1972 film ga “The Way of the Dragon.”
Tubtob nga siya ang nahatagan sang first leading role sa pelikula nga “Breaker! Breaker!”
Mas naglanog pa ang pangalan ni Norris sa mga pelikula sang 1970s tubtob 80s partikular na sa mga action hero movies.
Medyo naghuyang ang iya film career sang 1990s, kun sa diin siya ang nagsaylo sa television series nga “Walker, Texas Ranger” nga nagpadayun halin sang 1993 tubtob 2001.
Si Chuck Norris ukon Carlos Ray Norris sa matuod nga kabuhi ang natawo sa Ryan, Oklahoma, USA.
Matapos maggradwar sa high school, nagsulod ini sa U.S. Air Force sadtong 1958.
Sang madeploy sa South Korea, didto man nag-umpisa sa pagtraining sa martial arts si Norris, kalakip na sa Judo kag Tang Soo Do.
Matapos madischarge sang 1962, siya ang nagtrabaho bilang file clerk sa Northrop Aircraft, kag nag-apply bilang police officer, apang siya ang nabutang sa waiting list.
Gani siya ang nagtukod na lamang sang martial arts studio, nga nagdako kag naglapta, nga madamo naman sang mga nangin kilala nga estudyante.
Tubtob nga siya ang gin-engganyo sang isa sa estudyante nga si Steve McQueen nga magsulod sa acting.
Madamo man ini sang nadag-an nga martial arts competition, kalakip na ang International Karate Championship sang 1967.
Nakilala man si Chuck Norris sa social media trend nga “Chuck Norris facts,” nga naga-unod sang nagadugang nga listahan sang mga hyperbolic “factoids” tuhoy sa action star.
Si Norris ang may lima ka kabataan nga ginalakipan sang stunt performers nga sanday Mike kag Eric sa iya nagtaliwan na nga asawa nga si Dianne Holechek, kapid nga sanday Dakota kag Danilee sa asawa sini nga si Gena Norris, kag isa nga bunga sang “one-night stand” sang 1960s nga ginbuyagyag sini sa iya autobiography.
