Gina-engganyo sang Department of Labor and Employment (DOLE) Western Visayas ang mga employers kag mga participating agencies nga maghire sang madamo nga nagapangita sang trabaho sa tion sang Kalayaan Job Fair sa June 12 kun sa diin masobra sa 10,000 ka mga trabaho ang available.
Suno kay DOLE-6 Regional Director Atty. Sixto Rodriguez, tinutuyo sang job fair nga mabuligan ang mga fresh graduates kag iban nga mga job seekers nga makakita sang trabaho.
Patigayunon ang job fair sa main atrium sang SM City Bacolod kag ini ang magaumpisa alas-9:30 ang takna sa aga.
Ang event ang kabahin sang 127th Philippine Independence Day celebration nga may tema “Kalayaan, Kinabukasan, Kasaysayan,” nga nagatanyag sang 10,386 job vacancies.
Sa nasambit nga numero 8,852 ang local jobs nga ginatanyag sang 57 companies samtang apat sa licensed agencies ang nagatanyag sang 1,534 overseas positions.
Positibo naman si Rodriguez nga mangin maayo ang resulta sang job fair kag naglaom sang mataas nga numero sang mahire nga mga nagapangita sang trabaho.
Gin-athag man sini nga ang DOLE ang nagafacilitate lamang sang job apang ang hiring kag ang requirements ang nakadepende sa tagsa ka kompaniya.
Samtang ginpahayag ni DOLE-Negros Occidental Provincial Head Carmela Abellar nga 1,186 ka mga nagapangita sang trabaho ang nakaparehistro na online kag welcome man ang mga walk-in applicants.
Suno kay Abellar, ang job fair ang magaserbe bilang one-stop-shop kun sa diin ang yara ang mga ahensya sang gobyerno agud nga mabuligan ang mga nagapangita sang trabaho nga magproseso sang ila employment.
