Gindemolish na ang stall sang ginatos ka mga vendors sa Libertad Public Market nga nagapwesto sa dalan Amelia ukon sa idalom sang annex building kag sa Mercedes Street.
Huwebes sang aga, mismo ang City Legal Office ang nagsupervise sa demolisyon sang 235 ka mga stalls kag nagkooperar man ang mga manugbaligya.
Madumduman nga sang tinalikdan nga adlaw, ginsapol ni Mayor Evelio Leonardia ang mga vendors agud ipaathag sa mga ini nga igademolish ang ila mga structure kag isaylo sa annex building, santo sa mandu sang Department of the Interior and Local Government kag ni Presidente Rodrigo Duterte nga gub-on ang road obstructions.
Ang apektado nga mga vendors ang ginsaylo sa annex building kun sa diin sila ang ginhatagan sang tag-isa ka square meter nga pwesto kag depende sa resulta sang raffle ang ila pwestohan.
Gilayon man nga gindugangan ang mga pulis sa merkado kasunod sang pag-inaway sang pila ka vendors nga nag-agaway sa pwesto kun sa diin nalipong si Rose Alvarez.
Suno sa isa ka vendor nga si Sisa Impasi, nagahibubun-ot ini bangud kuntani sila nga taga-Libertad ang ginhatagan sang prayoridad gani nag-inagaway ang mga ini.
Suno naman sa market supervisor nga si Jona Abao, indi kuntento ang iban nga vendors sa nagabutan nila sa raffle gani sila ang nag-ilinaway.
Kadamuan nga nag-inaway suno sa iya ang nagabaligya sang prutas bangud wala man sang problema sa vegetable section.
Suno diri, wala ginlauman ang indi pag-intindihanay bangud antes ang demolition, ginsapol ang mga vendors para sa dayalogo.
