Masobra tunga sa milyon ka pesos nga balor sang ginapatihan iligal nga druga ang nakumpiskar sang Bacolod City Police Station 3 sa isa ka lalaki nga nadakpan sa drug buybust operation, Miyerkules sang aga.
Suno sa station commander nga si Police Major Ruel Culanag, newly-identified drug personality ang subject nga Daud Barahni sang Purok Mahayahay, Iligan City apang mahimo nga makabig ini nga high value target bangud sa kadakuon sang value sang shabu nga narekober sa iya possession.
Nagsugod ang transaction sa nasakupan sang Police Station 3 apang natigayon ang baklanay sa Purok Riverside, Sum-ag, Bacolod City.
Sang gin-imbentaryo, 537, 000 pesos ang kabug-usan nga balor sang iligal nga druga nga nakuha kay Barahni.
Suno kay Culanag, nagaarkila lang sang balay sa Sum-ag ang arestado kag duha pa lang ka bulan nga nagatinir sa Bacolod.
Naghana pa kuntani ini nga malagyo apang nakorner sang mga pulis.
