Ginareview pa sang Committee on Energy and Public Utility sa Sangguniang Panlungsod sang Bacolod ang isyu natuhoy sa gina-alegar masobra 6,000 ka mga illegal connections sa franchise area sang Central Negros Electric Cooperative (CENECO).
Sa interview sang Bombo Radyo Bacolod kay Councilor Claudio Jesus “Kalaw” Puentevella, nag-inquire na sila sa CENECO natuhoy sa status sang illegal connections nga sa inisyal nga report yara na sa 6,000 kag ginalantaw magadangat pa sa 8,000.
Paathag sini nga sila ang indi pa makapagwa sang official statement tubtob wala pa natapos ang assessment.
Suno kay Puentevella, bilang local lawmaker sila ang magapangita sang paagi agud masolusyunan ang isyu, bangod aminado ini nga makaalarma ang 6,000 nga numero sang illegal connections.
Ginalantaw sang konsehal nga mahimo may-ara sang problema sa proseso kaangay sa temporaryo nga pagpahanugot sang pagconnect partikular na as mga kulang ang requirements ukon may mga kwestyonable nga proseso.
Pahanumdom sini nga kun nagpahanugot gid man sang temporaryo nga pagtakod, dapat ini ang may timeline, kag gilayon man mahatagan sang nagakaigo nga metro.
Paathag sang konsehal nga safety sang mga pumuluyo ang nakataya sa nasambitan nga problema.
Panawagan ni Puentevella sa CENECO nga dapat sila ang may kontrol sa sitwasyon, ilabi na subong nga summer season nga dugay-dugay may nagaluntad nga sunog kag ang mga residential fire ang masami electrical in nature.
