Masobra tunga sa milyon ang balor sang suspected shabu nga narecover sa duha ka persona sa drug buybust operation nga ginpatigayon sa Purok Lilang, Barangay Banago, Bacolod City alas-2:50 kaina sang kaagahon.
Ang nga naaresto ang ginkilala nga sanday Teodolo Arro alyas Noy, 18 anyos, single, tricycle driver kag residente sang Purok Rojas, Brgy. Tangub, Bacolod City; kag si Veronica Alob alyas Tamtam, 26 anyos, miyembro sang LGBTQ+ community, single, wala sang trabaho, residente sang Purok Lilang, Brgy. Banago, Bacolod City.
Sa interview sang Bombo Radyo Bacolod kay Police Lt Richard Legada, assistant chief sang City Drug Enforcement Unit (CDEU) sang Bacolod City Police Office, si Arro nga ginakabig high value individual, ang nagabagsak sang dalagkuan nga balor sang illegal nga droga sa Brgy Banago, Goldenfield Commercial Complex sa Brgy Singcang Airport kag sa Brgy Tangub.
Suno diri, ang subject ang nagarenta sang balay kag amo ang ginapadulungan sang ila mga parokyano.
Narecover sa ila ang ginabanta 100 grams sang suspected shabu nga may standard drug price nga P680,000.
Sa karun ang duha ang nakahunong na sa Bacolod Police Station 3 kag natalana nga mangatubang sang kaso sa paglapas sa Republic Act 9165 ukon Comprehensive Dangerous Drugs Act 2002.
