Nagpadala na sang mensahe ang alkalde sa ciudad sang Bacolod sa National Water Resources Board ukon NWRB nga nagapangabay sang water rights sa Matab-ang River nga pagakuhaan sang supply sang tubig.
Sa pressconference, ginpahayag ni Bacolod City Mayor Alfredo “Albee” Benitez, nabutang sa mensahe sa NWRB, nga nagapangayo ini sang approval para water rights agud nga matigayon ang proyekto.
Nahibaluan nga magaserbe bilang bulk water supplier ang LGU nga magasupply sang 20 million liters per day nga tubig sa Baciwa-Primewater paagi sa water source nga Matab-ang River.
Ginpahayag man sang alkalde nga wala man sang conflict bangud sa bahin man sang ciudad sang Bacolod ang pagakuhaan sang source sang tubig.
Una na nga ginpahayag sang alkalde sang ciudad nga magapangita ang ciudad sang water source bangud sa water crisis sa Bacolod City.
Ginpahayag man sadto sang alkalde nga may kakulangan na sang tubig bangud sa El Niño, nadugangan pa ini bangud nagnubo sang 12 percent ang water supply sang Baciwa-PrimeWater.
May yara na sila sang natumod nga duha ka mga locations nga ginalakipan sang Matab-ang kag Bocal-Bocal Spring sa Barangay Alangilan.
Ang Bocal Bocal Spring ang sarang maka-deliver sang 5 to 8 million liters per day.
Samtang, ang ciudad naman sang Bacolod ang maga-initiate sang dugang nga 20 million liters per day halin sa Matab-ang River.
