BACOLOD CITY-Nagapati ang alkalde sang ciudad sang Bacolod nga nagakabagay sa pwesto bilang city administrator si anay councilor Em Ang.
Madumduman nga kahapon nagresign na si Atty. John Orola bilang city administrator bangud magatutok na siya sa iya nga duty bilang consultant sang ciudad.
Suno kay Mayor Evelio “Bing” Leonardia, may yara sang maayo nga track record si Ang bangud magluwas nga anay konsehal ini sang ciudad, isa man siya ka businesswoman, civic leader kag professional.
Dugang pa sang alkalde nga sa record kag performance pa lang ni Ang sa city council sadto, bastante na ini nga pamatuod nga sarangan niya nga matamdan ang iya nga papel bilang pinakamataas nga administrative post sa local government.
Samtang, ginakabig naman nga pagpang-hangkat sang anay konsehal ang bag-o nga pwesto nga ginhatag sa iya agud ipadayon ang maayo nga hinimuan ni Orola sa ciudad.
Suno diri, magatutok siya sa pagpabaskog sang local governance kag pagpakaayo sang kapasidad sang mga government employees agud makahatag sang mas maayo nga serbisyo sa pumuluyo.
Nagpasalamat man si Ang sa pagsalig nga ginhatag sa iya ni Leonardia.
Si Ang ang magasugod na sa iya trabaho bilang bag-o nga city administrator sumugod subong nga adlaw, Pebrero 4.
