Linibo ka mga pumuluyo sang Silay City ang nagtutok sa mainit nga debate sang mga kandidato sa pagka-alkalde sang ciudad diri sa Bombo Radyo.
Sa plugging pa lang sang Debate sa Bombo, madamo na ang nagpabutyag sang excitement sa pagsambuwa nanday incumbent Mayor Mark Golez kag former mayor Jose ‘Oti’ Montelibano.
Madamo sang mga isyu nga ginsabat nanday Golez kag Montelibano kaangay sang problema sa iligal nga druga, delivery sang basic social services sa mga pumuluyo, illegal structures sa Barangay Patag nga yara sa sulod sang Northern Negros Natural Park kag iban pa.
Ginhatagan man sang kahigayunan si Golez nga magpamangkot kay Montelibano, amo man si Montelibano kay Golez.
Nagpamangkot man ang ila mga supporters nga nagbantay gid sa idalom sang estasyon sang Bombo Radyo.
Ang Debate sa Bombo isa ka palaagyan agud mahibaluan sang mga pumuluyo ang plataporma de gobierno sang mga kandidato kag ang ila panindugan sa mga isyu.
Gin-imbitar diri bilang panelist sanday Green Alert Network Incorporated coordinator Anele Nulada kag Silay City election officer Atty. Kathrina Trinio-Caña.
Ang debate nagtakop sa pagkamustahanay sang duha ka mga kandidato kag pagpirma sang peace covenant.
Suno kay Atty. Caña, mapuslanon gid ang Debate sa Bombo bangud makabinag-binag ang mga pumuluyo.
Nagalaom man ini nga magaboto ang mga botante santo sa ila konsensya.
Sa opening statement pa lang sa Debate sa Bombo, nagsabtanay na sanday incumbent Silay City Mayor Mark Golez kag former mayor Jose ‘Oti’ Montelibano.
Ini matapos nga ginbida ni Golez ang iya slogan nga “Asenso Silay, Asenso sang Panimalay” nga suno sa iya, nasentro sa sinsero nga pagdumala sa ciudad.
Ginpabugal man sini ang determinasyon nga magpaluntad sang peace and order kag ang pagkuha sang ciudad sang madamo nga pasidungog kaangay sang seal of good local governance nagikan sa Department of the Interior and Local Government.
Madamo man suno sa iya sang nagsulod nga mga investments bangud nagsaka ang trust and confidence sang mga investors.
Suno kay Montelibano, pili lamang ang mga pumuluyo sang Silay nga nag-asenso sa pihak sang slogan ni Golez.
Panindugan sang anay alkalde, ginpadayon lang ni Golez ang pundasyon nga iya ginsuguran sang nagpungko siya sa Silay sa sulod sang siyam ka tuig.
Ginbanggi ini ni Golez nga wala nalab-ot ni Montelibano ang iya ginapabugal kun wala sang legislative support sang Sangguniang Panlungsod nga ginpamunuan niya bilang presiding officer sa sulod sang siyam man ka tuig.
Apang suno kay Montelibano, ang tanan nga gin-aprubahan sang Konseho ang ginduso sang executive branch paagi sa office of the mayor.
Yari ang bilog nga debate, live sa studio sang Bombo Radyo.
