Patay ang backrider sang motorsiklo matapos nga mawad-an sang kontrol ang driver sa Sitio Bunga, Barangay Orong, Kabankalan City, Negros Occidental kahapon.
Sa inisyal nga impormasyon nga nakuha sang Bombo Radyo kay Police Lt. Jomel Salarda, deputy chief sang Kabankalan City Police Station, ginkilala ang motorcycle rider nga si Romart Torres, menor de edad samtang ang back rider ginkilala kay John David Lindayao, 12 anyos kag mga residente sang Sitio Sulugon, Barangay Carol-an, Kabankalan City.
Santo sa inisyal nga imbestigasyon sang imbestigador sang Kabankalan City Police Station, padulong sa norte nga bahin sang Barangay Uringao sang nasambit nga syudad ang duha sang hinali nadulaan sang preno ang motorsiklo kag natumba kag nakabunggo sa steel railings sang karsada.
Bangud sa mabaskog nga impact nahulog ang duha.
Nakaangkon sang pilas si Torres samtang patal naman nga pilas ang naagom ni Lindayao.
Gindala pa sa malapit nga ospital agud nga mahatagan sang nagakaigo nga pagbulong ang mga biktima apang gindeklarar nga dead on arrival sang attending physician si Lindayao.
