Pilason ang menor de edad nga nagpangawat sang inugbulang nga manok sa Himamaylan City matapos nga ini ang madakpan kag ginbuno sang tag-iya.
Ang biktima ang ginkilala kay Regie Castino, 33 anyos, single, tricycle driver kag residente sa Sitio Tuyuman, Barangay Caradio-an, Himamaylan City, Negros Occidental.
Santo sa inisyal nga imbestigasyon, ginabantayan sang biktima ang iya inugbulang nga manok sang nakit-an sini ang suspetsado nga ginakawat ang iya nakahigot nga manok.
Ginlagas sang biktima ang suspetsado kag iya ginbuno sa likod sang makaduha ka beses.
Nahimo pa nga makapalagyo sang suspetsado padulong sa katubuhan apang nahimo man nga madakpan sa bulig sang kaingod balay sang biktima.
Gilayon naman nga nagtawag sa Himamaylan City Police Station ang biktima kag ginreport nga yara sa ila paghinakop ang suspetsado sa pagpangawat.
Nagpadulong man gilayon sa lugar ang Alert Team sang syudad kag ginkuha ang suspetsado.
Narecover sa possession sang suspetsado ang isa ka itom nga bag nga ginsudlan sang manok, ang inugbulang nga manok nga ginabanta balor P2,500 kag isa ka siyam ka bulan nga manok nga may kaangay man nga balor.
Ang suspetsado ang gilayon naman nga gindala sa Governor Valeriano Gatuslao Memorial Hospital para sa pagbulong.
Ang duha ka manok ang ginbalik naman sa tag-iya matapos ang documentation kag pagfile sang kaso.
