Nagpakilala nga katapo sang New People’s Army ang mga armado nga persona nga nagpanunog sang tatlo ka heavy equipments sa Sitio Medel, Barangay Carabalan, Himamaylan City alas-8:40 kagab-i.
Ini ang ginalakipan sang duha ka dump truck kag isa ka back hoe nga ginapanag-iyahan ni Mildred Grace Titular, 64 anyos, kasado, Punong Barangay sa Brgy Carbalan.
Sa interview sang Bombo Radyo Bacolod kay Police Lt Col. Anthony Grande, hepe sang Himamaylan City Police Station, gin-ako sang Punong Barangay nga siya ang nakatabun sang extortion letter gikan sa NPA sang 2023 nga wala sini ginsapak.
Sa karun, ini ang isa sa ginalantaw sini nga rasun sa pagsunog sang iya mga heavy equipments sang mga nagpakilala nga NPA.
Suno kay Grande, may quarry area si Titular sa lugar kag didto gina park ang mga heavy equipments.
Sa imbestigasyon sang kapulisan, ginpahayag sang watchman nga may lima ka persona nga nagpalapit sa iya bitbit ang mga long firearms kag nagpakilala nga sila ang NPA.
Pahayag pa sang mga ini nga ang tuyo lamang nila amo ang mga dump truck kag back hoe.
Suno sa mga suspect, perwisyo na ang natuga sang mga ini sa pumuluyo kag ang mga pigado ang mas labi nga nagapamigado.
Matapos sang warning, nagpalayo na lamang ang watchman sa lugar, kag didto na ginsunog sang mga suspect ang mga salakyan.
Gilayon man ang mga ini nagpalagyo sa wala matumod nga dereksyon.
Sa pihak nga bahin, may mga witness naman ang militar nga nagapahayag nga 10 ka persona ang mga suspects, lima ang nagpanunog samtang may lima nga nagserbe nga look-out.
Aminado naman ini nga makina gid ang ginpangsunog sa salakyan gani indi pa nila matumod kun magamit pa ini, bangod kinahanglan pa nla nga ipatsekyar sa mga experts.
Apang sa inisyal, ang balor sang kahalitan ang nagdangat sa P9 million.
Gina-imbestigahan na sang arson investigator sang Bureau of Fire Protection ang lugar, samtang ang kapulisan ang nagkoordinar man sa 94th Infantry Battalion sang Philippine Army para sa pagpatigayon sang joint pursuit operations.
