Igapalubong na lamang sa mga local government units ang bangkay sang mga katapo sang New People’s Army nga napatay sa engkwentro sa Brgy Salamanca, Toboso, kun wala sang pamilya nga magaclaim sa sulod sang lima ka adlaw.
Sa interview sang Bombo Radyo Bacolod kay Brig Gen Ted Dumosmog, Commander sang 303rd Infantry Brigade sang Philippine Army, ang mga bangkay ang natunga sa funeral parlor sa Toboso kag Escalante City.
Nahibaluan nga una nga gindala sa Escalante City ang 19 ka bangkay, apang nag-ayo ang punerarya nga isaylo ang iban bangod indi nila masarangan i-cater ang tanan.
Gani ginbalik ang 10 sa banwa sang Toboso, samtang siyam naman ang yara sa Escalante.
May pito naman nga nakilal-an samtang mayduha na ka pamilya nga nagaproseso sa pagclaim sang ila himata.
Panugyan ni Dumosmog sa mga pamilya nga magdala lamang sang dokumento nga makapamatuod nga himata sa pagclaim sang bangkay.
Paathag sini nga ginturn-over na sang Philippine Army ang kustodiya sang mga bangkay sa Philippine National Police, kag ang mga kapulisan naman ang may diber sa pagpagwa sang pangalan sang mga napatay nga NPA.
Apisar nga napasa na sa kapulisan ang jurisdiction, pasalig ni Dumosmog nga ang militar ang nakahanda gihapon sa pagbulig partikular na sa vehicle kag manpower assistance sa pagtravel sang mga bangkay sa lugar sang ila pamilya.
Samtang sa mga indi naman maclaim makaligad sang lima ka adlaw, hingyuon na lamang nila sa LGU sang Toboso ukon Escalante ang pagpalubong sa mga ini sa public cemetery.
Pagakuhaan man ang mga bangkay sang dokumento kag record, agud inkaso may magclaim nga pamilya, sarang lamang mapakuha ang bangkay.
