Ginpasalamat ni Bacolod City Councilor Wilson “Jun” Gamboa, author sang Bicycle Lane Ordinance sa Bacolod City ang ginahimo nga pagclearing kag paghawan sang mga dalan partikular na ang bike lanes.
Sa interview sang Bombo Radyo Bacolod sa konsehal, ang Bike Lane Ordinance ang gin-author sini sang 2017 kun sa diin ginkonekta sa mga major roads kaangay sang Circumferential Road, Araneta Street, Lacson Street, North Drive kag Burgos Street.
Ang purpose sini sadto nga indi lamang para sa recreational purposes ang mga bisikleta kundi mangin mode of transportation na padulong sa trabaho ukon padulong sa eskwelahan.
Ini ang mas bilidhon sa karun nga dako ang pagsaka sang presyo sang gatong.
Apang paathag ni Gamboa, para ini ang mapatuman, kinahanglan ang safe nga alagyan para sa mga nagabisikleta.
Gani nalipay ini nga sa ginahimo sang Bacolod Traffic and Transportation Management Department nga paghawan sa side walk, ginlakip na ang bike lanes, kag ini ang ginrepaint naman sang departamento.
Ini bangod nangin problema na ang mga guba nga salakyan nga nakaparada sa bike lanes gani madamo sa mga nagabisikleta ang kinahanglan pa nga magtaklas sa side walk ukon maglabay sa mismo nga highway sa paglikaw sa mga obstructions.
