Nakabalik na sa opisina si Bacolod Traffic Authority Office (BTAO) Head Patrick Leonard Lacson matapos ang 5-days suspension nga dagdag batok sa iya.
Madumduman nga ang suspension ang angot sa violation sini sa pagdala pauli sang Mayor Albee Benitez Cab (MABCAB) kag pagpalos sang sticker sini kasubong man sa pagdagdag sang memorandum nga nagahatag sang qouta nga lima ka apprehensions kada adlaw sa tagsa ka BTAO personnel.
Sa iya nga pagbalik sa opisina, isa sa natalupangdan sang BTAO Head amo ang bag-o nga mga street signs.
Suno kay Lacson, aminado ini nga iban sa mga street names ang indi pamilyar sa iya, ilabi na nga ini ang ginhimo sang Bacolod City Engineer’s Office.
Paathag sang mga ini nga kabaylo sa mga street signs kaangay sang 26th Lacson Street, ini ang gin-islan sang orihinal nga pangalan sang dalan.
Halimbawa diri ang anay nakilala sa 26th Lacson Street, nga sa karun ang nakabutang Marikina Street kasubong man sa 23rd Lacson Street, nga ginhimo Dr. Pablo O. Torres Street.
Aminado ini nga madamo sang mamag-uhan apang ini ang nagakadapat nga pangalan sang dalan santo sa naaprubahan sang layi.
Sa pihak nga bahin, aminado man si Lacson nga mabug-at sa budget ang pagkompleto sang street signs sa ciudad gani dako nga bulig diri ang mga pribado nga indibidwal nga nagapledge sang bulig.
Suno diri, may Bacolodnon nga nagmilyonaryo na sa Estados Unidos ang nakig-angot nga luyag sini nga magdonar sang 10 mil nga street signs kabaylo sang gamay nga advertisement, apang ini ang pagatalakayon pa sa Sangguniang Panlungsod.
