Ginalauman na sang Department of Education division of Negros Occidental ang pag-inabot sang mga delegates para sa Western Visayas Regional Athletic Association (WVRAA) Meet 2024 sumugod sa Abril 27.
Sa interview sang Bombo Radyo Bacolod kay Ian Arnold Arnaez, public information officer sa DepEd-Negros Occidental, ginalauman nga temprano pa maga-abot ang iban nga delegates agud makita ang ila nga billeting schools kasubong man ang playing venue.
Ginalantaw sini nga mahimo napanaogan naman sang derektiba sang DepEd-Bacolod ang pito ka mga billeting schools nga magpatigayon anay sang distance learning samtang nagapatigayon sang WVRAA 2024.
Aminado si Arnaez nga mas magamay lamang sa karun ang ginalauman nga numero sang delegates bangod anom lamang ka probinsya ang magacompete, indi kaangay sa Provincial Meet nga madamo sang mga Schools division ang nagsambuwa.
Ginapaabot sini nga yara lamang sa 7,000 ang delegates, kalakip na ang mga caoches kag trainors.
Sa Negros Occidental, nagadangat sa 500 ang mga magapartisipar nga atleta, samtang magadangat sa isa ka libo kun kaupod ang mga coaches kag trainors.
Magluwas sa Bacolod City may pila man ka local government units (LGUs) nga magahost sang pila ka sporting events kaangat sang Silay kag Talisay City, kasubong man ang San Carlos City nga ginrequest mismo ni Negros Occidental Governor Eugenio Jose “Bong” Lacson nga mangin venue sa long tennies.
Sa Elementary may-ara sang 15 ka mga sporting events, samtang 22 naman sa High School category.
Samtang may-ara man sang Para-Games para sa mga persons with disability (PWD).
Paathag ni Arnaez nga nagserbe na nga practice ang Provincial Meet sa mga patigayunon nga pagbag-o partikular na sa oras sang mga outdoor activities bangod sa tuman nga init.
Suno diri, ang outdoor games ang maga-umpisa alas-5:00 tubtob alas-9:00 sa aga kag magaresume alas-4:00 sa hapon pasaka.
Magluwas sa adjustment sa schedule, sila ang nagplastar naman sang medical responses, kag nagkoordinar sa Bureau of Fire Protection inkaso nga magkaproblema sa water supply sa mga billeting areas.
