Nag-apelar ang grupo sang mga doktor sa ciudad sang Bacolod sa kay Presidente Rodrigo Duterte kag national inter-agency task force (IATF) nga ipaidalom sa Enhanced Community Quarantine (ECQ) ang ciudad sa sulod sang duha ka semana bangud sa pagsaka sang kaso sang coronavirus disease 2019 (COVID-19) ilabi na local transmission.
Sa interview sang Bombo Radyo Bacolod kay Vice Mayor El Cid Familiaran, chairman sang IATF against COVID-19 sa ciudad, ginpahayag sini nga nagpaathag na si Mayor Evelio “Bing” Leonardia sa mga ini na nakadepende sa gihapon sa national IATF ang desisyon angot sa quarantine status sang ciudad.
Suno kay Familiaran nakasaad sa sulat sang grupo sang mga doktor ang ila nga concern ilabi na sa nagasaka nga kaso sang coronavirus kun sa diin ang Bacolod ang nagapanguna sa Western Visayas sa may pinakamadamo nga indigenous cases.
Ila man ginhatagan-pagtamod ang mga ospital nga nagdeklarar nga yara na sila sa full capacity kag ila man gin-ako nga ginakapoy na sila.
Suno sa bise alkalde, hulaton na lamang sang tanan kun ano ang mangin desisyon sang national government bangud nga pananglitan magbalik sa ECQ ang ciudad, maapektuhan gid ang ekonomiya.// Dugang pa sini nga kuntani balanse lang ang tanan.
