Tuman ang pag-pasalamat sang mga residente sang Purok Cagaycay, Barangay 2, Bacolod City kadungan sa pagbaton sang madamo nga donasyon kahapon sang hapon, Hunyo 13.
Nadumduman nga sadtong Lunes sang kaagahon, Hunyo 10, nag-ibwal ang dako nga kalayo matapos ang gina-alegar pag-inaway sang maglive-in partner sa diin ginhaboy sang babaye ang gas kag lighter nga amo ang gintunaan sang dako nga sunog nga naglamon sa 250 ka panimalay kag ini gin-deklarar sang Bureau of Fire Protection (BFP) Bacolod nga totally damaged.
Bangud wala gid sang may nasalbar nga kagamitan ang mga residente, gilayon nga naglunsyar ang Bombo Radyo Bacolod sa pag-panguna sang Station Manager nga si Bombo Mary Divine Grace Cuello sang “Oplan Kabalaka” sadtong Lunes sang udto, isa ka panawagan sa mga may bulawanon nga taguipusuon nga magdonar sang kagamitan nga wala na gina-usar, bugas, canned goods, kag iban pa nga mapuslan sang mga naapektuhan sang sunog.
Gilayon naman ginsabat sang mga tag-palamati sang Bombo Radyo ang panawagan sa diin Lunes sang hapon pa lang may nagpalab-ot na sang ila bulig, kag apisar gab-i na, ang iban ang nagasaka sa gihapon sa istasyon para lang magdonar sang ila bayo kag mga pagkaon.
Matapos ang duha ka adlaw nga panawagan, napuno sang sinako nga bayo, bugas, kinarton sang canned goods kag noodles , toiletress, school supplies ang Bombo Oplan Kabakala Center, samtang may iban naman ang naghingagaw pa dul-ong sang ila donasyon sa adlaw mismo sa pagturn-over,
Kahapon sang hapon, napuno ang 3 ka truck sang donasyon nga natipon sang Bombo Radyo kag ini ang gindul-ong upod ang Philippine Coast Guard Station Negros Occidental nga nagbulig panghakot sang mga relief goods sa Andres Bonifacio Elementary School II sa diin temporaryo nga nagatinir ang mga nabiktima sang sunog.
May mga pa-raffle pa nga ginpatigayon nga amo man ang nagpasadya sang pagtagtaganay sang bulig.
Dako naman ang pag-pasalamat sang mga residente sa ginpalab-ot sa ila nga bulig kay bangud diri, naghagan-hagan ang ila pag-antos kag ang kasakit nga ila ginabatyag bangud sa natabo nga trahedya.
“Overwhelming” naman suno kay Pacita Tero, head sang Department of Social Services and Development (DSSD) Bacolod ang ginhimo sang Bombo Radyo kag sa tanan nga indibidwal kag sektor nga nagpalab-ot sang ila bulig paagi sa Oplan Kabalaka.
Madamo naman ang nagdayaw sa ginhimo sang Bombo Radyo Bacolod bangud sa diri nga pamaagi mahibaluan kun paano gina-saligan sang tanan nga Bacoleño kag Negrense ang naga-panguna nga istasyon indi lang sa Rehiyon 6 kundi sa bug-os nga pungsod Pilipinas.
Sa tanan nga nagsabat sang amon nga panawagan kag nag-paambit sang ila hamili nga bulig, MADAMO GID NGA SALAMAT SA INYO BULAWANON NGA TAGUIPUSUON, MGA KA-BOMBO!!
